Tab nahi socha tha (2011)

Jab tum thhe tab nahi socha tha
Lagta tha zindagi padee hai
Par ab lagta hai wahi ek mauka tha
Aaj maut deewar ban ke khadi hai

Kuchh baatein samjhaani thi
Tumhari galtiyaan bataani thi
Aur wo ladai jo adhuri reh gayi thi
Mera vaar baaki tha wo niptaani thi

Tab nahi socha tha par ab yaad aata hai
Maafi bhi maangni thi, gale lagaana tha
Tumahara janamdin jo ab bhi har saal aata hai
Kasam li thi ek saal pahaad pe manaana tha

Jab deewar par dekhta hun tasweer tumhaari
Aage jeevan bemaani sa lagta hai
Bheetar kahiin to jagah thi tumhaari
Seene mein ab khaali khaali sa lagta hai

--

On the untimely demise of a friend

Baadal ... (2013)

--

rewritten

Judte hain, bichhadte hain, baras jaate hain,
Chalo hum koi baadal bann jaate hain...

Girte hain, sambhalte hain, chhalak jaate hain
Chalo hum maye ka sagar bann jaate hain

Haste hain, rote hain, Tadap jaate hain
Chalo hum koi pagal bann jaate hain

Tapte hain, jhulaste hain, pighal jaate hain
Chalo hum maa ka aanchal bann jaate hain

--

original 

Judte hain bichhadte hain baras jaate hain,
Chalo hum koi badal bann jaate hain…

Raat bhar dekha karein aankhon mein jaam,
Bin piye jhoomein pagal bann jaate hain

Saath mil ke chalein judaa rahon par
Kisi dariya ka saahil bann jaate hain

Ghum ka paimaane se kar lein hisaab
Bazm-e-maye ka saagar bann jaate hain

Muskurahatein sooni hain aankhein hain namm
Chalo hum maa ka aanchal bann jaate hain…

Jaago Bharat (2011)

Jis tarah pahaad se nikali ho sarita
Chahe jitni bhi ho raah ki kathintaa
Chhid gaye pahad gal gayi chattanein
Chal gayi pata rodon ko unnki heenta

Chal pade yuva maano aa gaya tufaan ho
Jis tarah samudra mein aa gaya ufaan ho
Jal rahi hai aag jaise samaj ek mashan ho
Har taraf dhuaan jaise jala vartmaan ho

Poori aazadi ka matlab ab humne jaana
Satya ahinsa ki taaqat ko fir pehchana
Apna dum duniya ko fir se ab hai dikhlana
Jaago bhaarat sapno ko hai satya banaana

Neend (2010)

Kal raat fir neend sirhaane tak aakar laut gayi

Aadhi meechi aadhi khuli aankho mein
Adhure ajeeb se khwaab aate jaate rahe…
Ghadi ki awaaz par thithakti saanson mein…
Thodi bechaini aur badhaate rahe…

Kuchh jaane pehchane chehre thhe
Kuchh naye anjaane bante bigadte rahe
Yaad teri bhi thi aur kuchh anjaan saaye thhe
Raat bhar wo saaye hasaate rulaate rahe

Kuchh halaat andekhe hokar bhi apne lagate thhe
Kuchh dhundhle chehre ajeeb si baatein banate rahe
Wo shayad kuchh kehna kuchh karwaana chahte thhe
Kabhi iss aur kabhi uss aur daudaate rahe

Aankh khuli to dekha ke taqiya thoda nam tha
Aaj din bhar ye kaisee khayalon ki sazish ho gayi hai
Kuchh naya nahi hai fir bhi ajeeb lagta tha
Wo bass ek raat thi ya zindagi hi aisi ho gayi hai?

Lagta hai kal fir need sirhaane tak aakar laut gayi…

Matt Chhedo (2010)

Matt chhedo iss aag ko, jalne do…
Bahut aanch chahiye iss patthar ko, pighalne do…

Badee der se thama hua hai samay, badalne do
Ye bhi dil hua Karta tha kabhie, machalne do

Bohot toofan jhele issne sambhal kar, fisalne do
Isse toda hai bohot jeewan ke thapedon ne, bikharne do

Unmukt chhod do is mann ko, udane do
Kab tak ladoge aansuon ke toofaan se, guzarne do

Matt chhedo iss aag ko, jalne do…
Bahut aanch chahiye iss patthar ko, pighalne do…

Mom ki gudiya

Mom ki gudiya mein jaan utar aati hai

Meri bachhi jab usse seene se lagaati hai  

Bass chalta to gudiya phir se jaag ke so jaati 

Wo jitne pyaar se usse loriyaan sunaati hai

Usska jeewan usski paribhasha se chalta hai

Usska din usske sone jaagne se badalta hai

Chaand aata hai balcony mein usske liye 

Sooraj usske maathe ki bindi se jalta hai 

Kabootar ko gutar goo koyal ko raag sikhati hai 

Qabaad ke chaar samaan jod ke ghar banaati hai

Ussko kya sikhaayein koi rangbaazi ki kala

Geeli ungaliyan pher ke wo indradhanush banati hai

Mom ki gudiya mein jaan utar aati hai

Meri bachhi jab usse seene se lagaati hai  

Achha lage to comment zaroor karein!

Ishq hota nahi sabhi ke liye....

Zindagi chhoti si hai,Aur hain mushkilein anek
Do char hi ko to pyar kiya Wo bhi ek ke baad ek

Pehla pyar mera haseen tha gulfam ki tarah
Kuchh hi palon míen chalak gaya jaam ki tarah
Tez raftaar wo guzar gayi kisi aur ke saath
Mein dekhta reh gaya tang awam ki tarah

Fir doosri baar jab ho gaya ishq ka bukhaar
Wo dosti thi jo dheere dheere bani khumaar
Na wo kuchh keh saki na mein keh saka kuchh
Khoobsoorat hai wo rishta, hai aaj bhi barkaraar

Ab teesri baar fir ye aafat aayi hai…
Dil ki surkhi fir rang laayi hai
Uski nigaaahien uff shokh hain haseen hain
Khuda jaane kya shaamat aayi hai

Har tarah iss dil ko manaa ke dekha
Sab dhokha hai ye samjha ke dekha
Fir bhi na maane to kya kijiye…
Bas usko hi chaahe to kya kijiye…

Dekhte hain ye rangat kya rang laati hai
Kitna suljha paata hun aur kitni ulajh jaati hai
Kehne ko to keh doon mein alfaaz dil ke par
kitna mein keh pata hun kitna wo samajh paati hai

Zindagi chhoti si hai,Aur hain mushkilein anek
Do char ko hi to pyar kiya Wo bhi ek ke baad ek